designed by: M. Aladdin & H. Fathy

Tuesday, October 04, 2005

هل هلالك يا رمضان


لما كنت صغير كنت احب اعمل راجل و اكمل صيام اليوم و الشهر كمان. أمال! ده انا كبير و اعجبك قوي. بابا من ناحيته كان واخد المسألة اثبات للرجولة، و كلام بقي زي: ايه ده؟! انت مش عارف تمسك نفسك خالص؟! تبقي راجل ازاي؟! و طبعا--و لحد دلوقتي، بس ده سر بيني و بينكم--انا بصوم علشان اثبت لصورة بابا جوايا اني فلة و جدع و ابن حلال
رمضانات كتير، و بمب كتير، و فوانيس و مسلسلات و ألف ليلة و ليلة كانت حلوة زماااااااااااااااان و فوازير عمري ما حبتها. صوت الادان و الناس بتجري تلحق الفطار و انا لابس فانلة ايطاليا رقم عشرة--عم روبرتو باجيو طبعا--و راجع بهدوء علي البيت. الشوارع اللي تبان ناعسة بعد الفطار بس هي مخبية ناس عيونهم مفنجلة علي التليفزيونات، و بعد شوية صغيرين ح تلاقي الشارع النعسان جرئ زي كازانوفا
رمضانات كتير، الطعم واحد رغم فتوره من سنين، بس رغم كده برضه بتكون فيه رمضانات مميزة. زي رمضان اللي قضيته انا و زمايلي في الام بي سي. فاكر عزومة الفرشنكاح اللي عزمنا عليها بلال فضل، و قعدنا احنا الستة--خمسة في الورشة و بلال--في مبني الام بي سي لوحدنا ناكل فرشنكاح و نهرج، فاكر ساعة ما كان حوار صريح--او برنامج تاني مش فاكر--عامل حلقة مع نادية الجندي و انا عمال اتريق و بلال و العايدي بيضحكوا. فاكر قبل العزومة دي كوبري 15 مايو. انا ماشي علي رجلي و الكون كله هادي. شفت بنت و ولد قاعدين علي الدكك تحت الشجر العتيق الكبير قدام النيل. الله.. يا جماعة الفطار خلاص.. كلها 10 دقايق.. عادي بقي يا علاء. الحب جميل
كل سنة و انتم طيبين

10 comments:

AZ said...

من ذكريات رمضان السعيده بالنسبالي اما بتاخر في الشغل واروح بيتنا ساعه الادان وتلاقي الوحوش الكاسره اللي كانت بتضربك عشان تركب قبلك الميكروباص تحولت لبنى ادمين كل واحد بيطلع شويه تمر من جيبه ويناول اللي حواليه... والبياعين اللي بيطلعوا عينك طول السنه في الفصال علي جنيه واتنين تلاقيهم طالعين بيجروا وراك في الشارع بالتمر وكبايات بلاستيك فيها قمر الدين.. هو اينعم بعد الفطار يرجع تاني ابوك عند اخوك بس علي الاقل بتبقي استمتعت بوجودك وسط بني ادمين حواليك لفتره مهما كانت وجيزه

ghandy said...

كل سنة وأنت طيب يا علاء
أنا أحلى ذكريات رمضان بالنسبة لي كانت وإحنا عيال وكُنا بنبيت عند جدتي
وكان المسحراتي يعدي وكنا ننبسط
وكانت جدتي - الله يرحمها - تحب تشوف القمر على وشوشنا وتقول إن ده فال حلو

Omar Mostafa said...

ومش هانسى يا لول قعدات السطوح والفطار مع بعض والغنا والدردشة مع الشلة القديمة، السيدة زينب والمنيرة ودار الهلال كانوا دفا قوي في رمضان، هنفطر سوا ضروري السنة دي، رمضان كريم يا لول

Lasto-adri *Blue* said...

كل سنة و إنت طيب يا علاء...
وحوى يا وحوى....

Eve said...

رمضان كريم. هيدي فرصة للحدّ من الالتفات ذات اليمين وذات اليسار ;-)

Muhammad Aladdin said...

آز
عندك حق.. الادمية بقت عملة نادرة اليومين دول

غاندي
و انت بصحة و سلامة يا فندم.. انا بقي كنت عايش عند جدتي، فده كان عادي يعني
:)

إن
و انتي بصحة و سلامة يا إن، و يعيده عليكي بخير يا رب

عمور
لا.. سطوحك و سهراتنا دي لازملها بوست لوحده، مش تفصيلة كده في وسط موضوع عن رمضان.. بجد مين ينسي الايام دي؟ و طبعا لازم نفطر سوا.. و وعد الحر يا سيدي
:)

لست ادري
و انتي كمان يا قمر.. البلوج نور

إيف
و الله ما بيحوقش فيا! و علي فكرة بقي معلهش: هما اللي بيبصوا مش انا
:p

Shurouq said...

كل عام وانت بخير علاء :)

Muhammad Aladdin said...

و انتي بخير يا شروق
ملحوظة: علي فكرة الكتاب رجعلي
:(

mindonna said...

رمضان كرييم يا علاء
:)

Muhammad Aladdin said...

هوبي و مينادونا
و انتم بصحة و سلامة :)