ربنا يسعدك، زي دايما ما بتسعدني

كنت النهاردة مع صديقة شاعرة في مكتبة ديوان، كنت بوريها كام كتاب كده كنت شايفهم مهمين، و كانت هي أول مرة تزور "ديوان".. ديوان في رأيي المتواضع هي اهم مكان في القاهرة لو انت بتحب الكتب، و بالتأكيد، هي اجمل مكتبة خاصة في مصر. منظمة علي الطريقة الأمريكاني، اللي بيها ممكن تلاقي مكان لطيف جوا المكتبة تاخد فيه النسكافيه بتاعك، ده غير أنك ممكن تتمتع بجلسة لطيفة علي فوتيه وثير، إن شالله طول اليوم، و انت بتقرا ف الكتاب ده و الكتاب ده، من غير أي ازعاج نهائي--طبعا ده وضع طبيعي و عادي للناس اللي قاعدين بره، لكن للأخوة اللي قاعدين في مصر، و اللي ممكن يرهبهم البياع بكلمة "ايوة؟"، دي تبقي حاجة لطيفة خالص

و في لحظة سحرية، لفتت نظري لوحة كبيرة شيك جداً، بتقدم اقتراحات ديوان لقرائها، فشارورتلها عليها و انا بجري بنظري علي اسامي ماركيز، و كونديرا، و هرمان هسه، و... هنا قالتلي

"بص.. دول حاطين رواية العايدي"

فعلا! مكتوب وسط كل دول "أن تكون عباس العيد".. و قدامها "احمد العايدي" بخط كبير و فني..ماتتصوروش أنا كنت فرحان قد ايه.. و ف لحظة، استرجعت لحظات مرت من عمري زي البرق، بس سابت ف روحي عطر مش ممكن يتمحي.. أنا و احمد ايام مجانين، و سندويتشات شاورما الفراخ بتاعة "ثري واي"، و قعدتنا ف قهوة منه فيه، و لحظات سهرنا في الأم بي سي علشان نبعت حلقة دريد الجديدة قبل الساعة 9 الصبح.. افتكرت اطباق الفول، و كوبيات الشاي، و الصعلكة جنب شريط مترو مصر الجديدة. افتكرت افيهاتنا و احنا بنحضر سيناريو جديد، احلامنا و احنا بنحضر اول افتتاح لسيلانترو الزمالك--اللي كان جنب مكتب الام بي سي، و حتي لما كنا بنقف في ديوان--برضه كانت قريبة من شغلنا، و كنا موجودين ساعة افتتاحها--و نقلب ف الكتب و نقول أمتي ح نشوف رواياتنا معروضة هنا. افتكرت ساعة لما شفنا أن تكون عباس العيد فيها لأول مرة، محطوطة علي الأستاند في وش اللي داخل و اللي خارج. افتكرت لما احمد كلمني و قالي: علاء! كتاب الكوميكس بتاع ورشتك ف ديوان باللغات التلاته

جه اليوم اللي فيه ممكن ناخد فسحة صغيرة من الزمن، و نبتسم، و نحاول ما نتغرش باللي بيحصل حوالينا، لأن اللي احنا فيه ده بداية، مش نهاية.. لسه فيه--و دايما ح يكون فيه--شغل كتير. حصل أن احمد كان مدعو لحضور معرض فرانكفورت--بس هو فضل دعوة من جامعة ايوا بأمريكا ساعتها-- و بالمناسبة دي الناشرين الألمان طلعوا كتيب صغير، اسمه ميمو، شفت فيه الفصل الأول من "العبد" مترجمة بالألمانية، وسط نصوص لناس زي إدوارد الخراط و زكريا تامر--اللي العايدي بيموت فيه--و رغم أني معرفتش اقرا بالألماني--طبعاً--بس كان هو ده الشعور الجميل: الشعور بالكلام اللي كنت بسمعه من احمد في مكالمتنا الصباحية، و بعدين ف كتاب، دلوقت بقي مترجم للغة مش قادر اقراها

الشعور بتاع ديوان كان جميل، و متفرد بصفة ما، احنا متعودين أن لا كرامة لنبي في وطنه، فلما وطنه، في النهاية، يكرمه، و يشرفه، و لو بشكل اقل من اللي هو يستحقه، ده بيبقي ليه طعم تاني

ربنا يسعدك يا احمد ، زي ما انت دايما بتسعدني، و بتأكدلي في كل يوم جديد أن فيه ناس تستحق الحياة، و الجمال، و الحب.. ربنا يسعدك حتي لو كنت انت اول واحد ما بيقولش علي الحاجات دي بدافع التواضع و السمو، لأني--بطريقة و لا بأخري--ح اعرف اكيد

الفصل التالت من رواية "أن تكون عباس العبد"، مترجمة إلي اللغة الأنجليزية--و آسف إني معنديش نسخة ديجيتس من

النص العربي نفسه-- ممكن تقراه هنا

www.uiowa.edu/~iwp/WRIT/documents/AlaidyBeingAbbas3chapformatted.pdf

و عن رؤيته للكتابة، ده نص الكلمة اللي اقاها في برنامج الكتاب الدوليين--جامعة ايوا

www.uiowa.edu/~iwp/EVEN/documents/Fantasy-Al-Aidy.pdf