designed by: M. Aladdin & H. Fathy

Monday, April 18, 2005

بطل طفولتي

ايوة.. هو بطل طفولتي لما كنت بقرا مغامراته و اتفرج علي كارتونه، و هو برضه أمل شبابي الحالي.. عم بطوط (دونالد).. دايما في بالي مديها راحة عجب علي سرير الشجر، كوباية اللمون علي الترابيزة جانبه، الكتاب ف ايديه. ليه جيرل فريند ، الست زيزي (ديزي)، بتطلع عينه و بيطلع عينها، بس الحياة ماشية.. برضه طبعا عم دهب (سكروتج ماكداك)، و رحلاته الغريبة بحثا عن جوهرة المهراجا، أو كنز الهيملايا، أو حتي التنقيب في المريخ عن معدن البلباطين النادر.. حياة لطيفة بشكل محبط، كسل تلاقي و مغامرات تلاقي.. كل ده و سي بطوط مديها و عايش الحياة بالطول و بالعرض و بالورب كمان.. يعني برضه ما يخلاش من جار غتيت، أو عدو عاطفي رخم، بس ف الاخر كلهم ظراف، و المسائل مش جد أوي
مشكلته انه ح يفضل متميز، و اللي يحاول يقلده--زيي--غالباً جداً ح ينتهي بيه الحال إلي كونه مجرد "دكر بط". الصين منعت دخول رسوماته و افلامه لأراضيها لأنه "عميل للمخابرات الامريكية".. مش عارف بقي.. عميل و لا مش عميل.. ماشي بنصه التحتاني عريان.. عصبي و ابن ستين جزمة ف اوقات كتير.. بس برضه ح افضل احبه.. بطوط.. بحبك يا ابن الكلب







ياااااااه! هنا كأن الواحد شايف نفسه ف مرايه
:P

3 comments:

shoralka said...

:) وماله يا فندم حبه زى ما انت عايز بس بالراحه

انا كمان بحبه اعتقد كتير غيرنا كده ربنا يهنينا بيه ويخليهولنا دايما

Muhammad Aladdin said...

:)

سالي محمد سالم said...

وانا صغيره مكنتش عارفه انا بحبه ليه وبستهيف ميكي اوى ليه ولما كبرت ولقتنى لسه بحبه ولسه بستهيف ميكي عرفت ان الحكايه ان بطوط اساسا واحد مصرى