designed by: M. Aladdin & H. Fathy

Tuesday, April 19, 2005

طب بتخاف من الستات ليه؟

سؤال وجيه فعلاً. ليه؟ همممممممممممم
في يوم من الايام، كنت سهران أنا و د. علاء الاسواني، مؤلف رواية عمارة يعقوبيان الشهيرة، في قهوة الحرية الدافية ف باب اللوق--منطقتي. فيه عادة اننا نتقابل في كل يوم خميس بالليل في شبه ندوة ادبية. يوميها كملنا كمان السهرة. ساعتها هو قالي فجأة
"خالي بالك يا علاء.. اي واحدة ح تكون حنينة معاك ح تحبها"
كنت عارف هو بيقول كده ليه.. لأني اتربيت من غير أم.. هي موجودة، بس انا و هي مش ف بيت واحد
ابتسمت و قلتله
"ماتخافش"
و فعلا مالوش حق يخاف.
أنا كائن خواف جداً، و كائن هراب جداً، و دايماً ف بالي مسألة الحنان دي.. يعني كأن فيه واحد ببلطة بيطلعلك فوق دماغك و يناولك في الوقت المناسب للتواطؤ: حاسب يا حمار! انت بتضعف علشان الحنان
و غير ده بقي، فيه ابليس مهم جداً ممكن يفضل يلعب ف دماغك.. "البنت دي مش اكيد بتحبك".."هي بيتهيألها".. "اكيد حاسة بكده علشان انت بتسمعها".. ألخ ألخ ألخ
و الابليس و ابو بلطة مش سايبني في حالي خالص.. علشان كده انا بعترف بالجملة الجاية دي كتير: أنا صعب جداً اني احب
الارتباط الوحيد ف حياتي--مش ح اعد اتنين تانيين علشان دول كانوا مراهقة--اخد من البنية سنة و نص لغاية ما الصنم اللي هو انا اتحرك
أنا كائن بيشوف غالبا أن مصير الفيران و حياتهم لطيفة جدا.. آمنة و من غير صدمات
أنا--بشكل أو بأخر--اتصدمت كتير ف حياتي، و مش مستعد اني اتصدم تاني في اي ناحية منها. عارف: انا اكيد حمار و اهبل و ابو ريالة في نظرك.. بس اعمل ايه؟

4 comments:

أحمد said...

هو اى مصيبة لازم تجيبوا سيرة الناس فيها

Anonymous said...

المدونة عموما مش محتاجة أني أقول عليها حلوة لآن أكيد في ناس كثير قالو كده

وأنا قعدت أقرا فيها كثير وكان نفسي أعلق علي حاجات كثير بس للأسف أنا مسقط علي الاخر ومنمتش بقالى كثير.. بس بصراحة معرفتش أنام قبل ما أعلق هلي التدوينة دي..

طبعا أنا مش لاقي كلام أقوله .. بس هي لمست حتة جوايا .. حتة بيقولو عليها القلب..

تصبح علي خير

Muhammad Aladdin said...

معلهش بقي يا سيدي.. خير خير

ديد مان
اشكرك علي الكلام الجميل يا سيدي
:)

سالي محمد said...

ماتحبش عشان متتجرحش
ولو حبيت متتديش عشان متضعش
ولو ضعت اضرب نفسك بالجزمه لانك مقرتش الجمله اللى فوق كويس