اسمها راندا جرار.. امريكانية مولودة من أب فلسطيني و أم مصرية و جدة يونانية و عاشت ف الكويت فترة طويلة و بعدين بتدرس دلوقت الكتابة ف تكساس.. كتير.. مش كده؟ انا معاكوا، و خصوصا لما تعرفوا أن دمها زي السكر. و انها عندها ولد صغير نص ايطالي تقريبا. كتير جدا فعلا.. علشان كده، لما بعتتلي روايتها امبارح بليل مكنتش قادر غير اني اخلص منها أول بارتيشن في نفس الليلة (حوالي 28 صفحة ايه فور).. فيه ثراء رهيب و خفة دم رهيبة و قباحة رهيبة و المعية رهيبة.. راندا زي ما تكون بتقولي : كاتب ايه اللي انت بتقول عليه يا بن الدايخة؟
الرواية اسمها "خريطة المنزل"--أو خريطة الوطن، علي حسب المعني النهائي بعد القراية، بس انا بميل للوطن-- و المفروض انها تنزل قريب من دار نشر امريكية، و انا فعلا مستني النسخة أم اهداء بفارغ الصبر.. أنا شفت راندا في صيف السنة اللي فاتت في زيارة خاطفة لمصر، مع العايدي، و خرجنا خروجة لطيفة فعلاً كلنا ، أنا و هي و العايدي و حاتم، استمرت لغاية الساعة الرابعة فجراً.. أي نعم شفنا فيلم زفت--بس الامانة لله: حاتم بطل.. اتفرج علي الفيلم ده معانا لتاني مرة مجاملة. كان يوم حلو جدا و استمتعت فيه بمعرفة البنت الشيطانة دي. و الحمد لله حصل انها استمتعت برضه، و كتبت ده ف الويب بلوج بتاعها (هي لاغته مؤقتا دلوقت) انها "قابلت اوسم تلات رجالة في مصر، ده غير ظرفهم".. طبعا أنا و العايدي بصينا لبعض لما قرينا ده و قولنا: وسامة ايه بنت الهبلة؟ هو حاتم ماشي.. بس احنا الاتنين هربانين من معمل تجارب جينية اساسا
و حصل انها لما كلمت العايدي ف امريكا--كان مشارك في برنامج الكُتاب الدولي هناك--راحت سألاه سؤال بسيط: بجد بقي، احنا هنا ف امريكا و كله تمام.. انتوا كنتوا شاربين بقي ايه ساعتها؟
علي العموم أنا فعلا متشكر ليها جدا علي اهتمامها و تفضلها ببعت النسخة دي ليا قبل النشر.. متشكر يا راندا.. متشكر كتير
و إن شاء الله ح ابلغكم هنا لما الرواية فعلاً تنزل
3 comments:
here is the old post about meeting you and ahmad and hatem in cairo:
http://rockslinga.blogspot.com/2004/07/meeting-cairo.html
HAHAHAHAHAHAHAHAHAH! I don't know weather I delete it, not to be acused by narcessism, or let it here, not to be acused by lying..OK, R, I'll let it!
:P
Thanks a million, again, for letting me read that marvelous piece of art.
Love ya dearly,
Al
ease imposition representing animation diarrhea intersect prominent chomsky froglog hatch shionogi
lolikneri havaqatsu
Post a Comment