designed by: M. Aladdin & H. Fathy

Saturday, May 21, 2005

A Typical Libra Guy!

ده اللي قالتهولي آز مرة في الكومنتس.. و لأني مش عارف فعلا ايه هو "مولود برج الميزان النموذجي"، فقلت اكتب لسته باللي انا اتخيل معرفته عن نفسي.. يمكن يكون ده مواليد برج الميزان فعلا
:)
1- مش منظم نهائي.. يمكن احب النظام كقيمة، بس بفشل دايما في تحقيق ده.. بس علي فكرة اوضتي تبان مبعترة يمين و شمال، بس أنا عارف دايما مكان الحاجة اللي انا بدور عليها فين.. يعني حاجة كده زي الفوضي المنظمة.. لو جازت التسمية
2- مدخن شره
3- عصبي بامتياز.. بس فيه درجة معينة ف الغضب أنا بحاول ما اوصلهاش.. احم.. بتوصل لمرحلة كسر الحاجات اللي بشوفها ف وشي
4- حياتي كلها تقريبا بتدور حوالين الكتابة.. يعني مش متصور نفسي حاجة تانية تليق بقدراتي زي مبيض محارة أو منادي سيارات
5- كسول جدا.. بس ف ساعات كتير ممكن انجز بسرعة خرافية-- و دي مش مبالغة و الله
6- مستهتر لأقصي حد
7- متناقض بسهولة شديدة.. البني آدم اساسا متناقض.. بس انا عندي العملية زيادة شوية.. يعني مثلا: فعلا فعلا أنا من النوع الخجول جداً--لدرجة إن فيه بنات بتفتكر أني متعالي لما يقابلوني أول مرة--بس لما اقعد معاك مرة، ح تلاقيني باعملك كأني اعرفك طول عمري
8- بحب المزيكا جداً
9- من مواليد باب اللوق و من عاشقي وسط البلد: يعني عندي ارتباط شديد بالمكان
10-للأسف: بحب الستات جدا!!!--جتني نيلة
11- بحب القطط جداً.. و طفولتي حافلة بالشوارب اللي ماشية هنا و هناك.. و لغاية دلوقتي مربي 3 قطط ف الشقة
12- بكره الأدعاء جداً، رغم إني أظن نفسي متسامح و متفهم لطباع البشر
13- عندي ايمان كبير بفكرة الأبوة.. فيه بنات مش مصدقين أني بفكر ف أولادي من دلوقت --أنا مش متجوز، سايكو يعني
14- عندي اعتداد كبير بنفسي، لدرجة إن حاتم بيحب وصف سياستي بـ"و آدي القهوة بتاعتكو".. ف ساعات ما ده ما بيكونش كويس
15- ضعيف جداً جداً قدام نفسي.. يعني ما بعرفش اغير من نفسي خالص.. كتير بقول: أنا بعمل الشيء الغلط دايما لو ريحني--بس لو ما آذاش حد غيري
16- عندي افتنان ما بمراقبة الخيل العربي و صوره
17- بخاف اني احاسب حد.. لأن ده مش اسلوبي أولا.. و لأني عندي كابوس أني ممكن في يوم من الأيام اكون مطرح اللي بحاسبه.. نفس الشيء علي الأراء.. مفيش حد عنده الصح المطلق: بس لازم يكون عندي انا صحي المطلق--علي رأي مارتن بوبر
18- حذر في ابداء الرأي، أو في الرد علي أي عرض، ده بيديني مرونة اكتر ف التصرف، زي مانا دايما بقول
19- الأفلام و الكتب ضرورة ف حياتي.. مش متخيل أني اعيش من غيرهم--بمعني أني اكون القارئ أو المتفرج
20-طبعا.. طبعا.. طبعا.. بحكم المهنة: كلامنجي معتبر :)

6 comments:

Anonymous said...

جميل انك تعرف نفسك بس الاحسن انك ماتصنفش نفصك علشان ماتضيقش حدود تفكيرك وقدراتك يعنى من برج كذا شخصية كذا يعنى... مش عارفة هتفهم فكرتى ولا لأ بس نصيحة ابعد عن تحليل نفسك وما تطلعش منها غير عيوبك اللى ممكن تاثر على حياتك وطلع سيف ارادتك وتخلص منها. فكر فى مزاياك ساعة الياس و الرغبة فى التحدى بس. و.. وعلى فكرة السجائر مش بس بتضرك بس دى بتضر اللى حواليك كمان ...هه بتحب تضر اللى حواليك

Muhammad Aladdin said...

:)
مسألة الأبراج دي كانت مجرد افيه للموضوع نفسه، و انا بني آدم محلل بالعافية، و علشان كده بحلل كل حاجة ابتداء بنفسي.. و شكرا علي النصايح يا ستي

بالنسبة للسجاير: مش ح اعرف ارد عليكي، علشان كده ح اعمل نفسي مش واخد بالي
:)

علاء

Eve said...

المشكلة إنك مش بس بتدخّن كتير، لأ، كمان عم تتباهى في ذلك. وقّف التّدخين، أو على الأقل التّحدّث عن التّدخين، لأنّي أشعر بالاختناق لا كّما شممت رائحتها فقط، بل كلّما قرأت كلمة سجارة أيضاً
:pp

Muhammad Aladdin said...

إيف.. عايز اقول لحضرتك إن التدخين ما يحلاش إلا في حضرة سموك
:)
و دي مش شتيمة و الله، بس احسبيها كما لو كنتي مدخنة شرهة، فحتفهمي قصدي

AZ said...

دى مالهاش علاقه بشراهه التدخين.... دى ليها علاقه بالمزاج.... اى حد صاحب مزاج فى اى حاجه هيفهم شراهتك فى التدخين

Muhammad Aladdin said...

ماشي سا صاحبة المزاج
:P