رحلها فرنسا يا خويا

حاتم فتحي..أهم واحد بيرسم في جيلنا علي حد رأيي المتواضع.. بتجمعني بيه صداقة عميقة، تقريباً متشابهين بطريقة مرعبة خاصة في فن الافيه، حتي لو كانت افيهاتنا-- أنا و هو و فردتنا التالته الروائي المهم جداً أحمد العايدي-- بتثير غالباً ردود فعل ابسطها علامات الاستفهام اللي بتلعب في وش اللي قاعدين معانا.. و ممكن كمان كام كلمة مالهاش لازمة زي "هو ايه الـ***** ده؟!!" ع العموم احنا ما بنزعلش خالص، لأن أرسطو كان بيشتغل شماشرجي عند الاسكندر، و لأن لا كرامة لنبي في وطنه، و لأن الخال والد.. و كده يعني
(كمثال علي افيهاتنا، رجاء متابعة كوميكس "بوكا و سكامونس" اللي بيكتبه العايدي في جريدة الدستور)بص على اسكتشات حاتم

عم حاتم معايا أون لاين دلوقتي، و وراني رسمه لبنت فرنساوية في موقع فني علي النت، و لما قلتله "بنت الهبلة سايبه الايميل بتاعها يا وله!" راح قايلي "رحلها فرنسا يا خويا!"
و الله اقتراح مهم--ألمعي علي رأي سيبويه-- ديتها بس كام ألف دولار لزوم السفر و الاقامة و الذي منه، إضافة لمبلغ اضافي لزوم الشاش لو البنت شاورت عقلها و لا حاجة
مش مشكلة خالص .. أخيراً الواحد ممكن يخلص من زنوبة و ست ابوها و موديلاتهم المتطورة زي رشا و هبة و دعاء.. و كمان يخلص بالمرة من كام كاراكتر بيحطوا بوزهم بالعافية ف حياته زي كمال الشاذلي و صفوت الشريف ..كنت فين يا حاتم أنت و افكارك النيرة!